Патреккелти пĕтĕмĕшле пĕлÿ паракан тĕп шкулта раштавăн 19-мĕшĕнче ĕçлĕ шав вĕресе тăчĕ. Сăлтавĕ вара пысăк. Хăйсен ентешĕн, Патреккел ялĕнче çуралса ÿснĕ Александр Георгиевич Миллинăн, публицистăн, журналистăн, куçарÿçăн, çыравçăн 90 çулхи юбилейне пысăк хавхаланупа паллă турĕç кунти вĕренекенсем. Уява ирттерме çыравçăн Шупашкарта ĕçлекен ывăлĕ Борис Александровичпа унăн мăшăрĕ Валентина Николаевна, Чăваш наци радион тĕп корреспонденчĕ Егоров Владимир Евгеньевич килсе çитрĕç.
Малтанах 9 класра вĕренекен Карамаликова Анастасия А. Г. Миллин пурнăçĕпе пултарулăхĕ çинчен хатĕрленĕ презентаципе уçăмлăн паллаштарчĕ. Шкул ертÿçи О.Г.Петрова пухăннисене уяв ячĕпе саламларĕ. Чăваш чĕлхипе литературине вĕрентекен Г.Л.Енейкина вĕрентекен çак уява тата А.Г. Миллина халалласа çырнă çырнă сăввине вуласа пачĕ, ентеш пултарулăхĕ çинчен çирĕплетсе пачĕ.
1-9 классем хушшинче А.Г.Миллинăн хайлавĕсем тăрăх хатĕрленĕ сценкăсен конкурсĕ пурне те тыткăнлама пултарчĕ. Кашни класра вĕренекенсем хăйсен ăсталăхĕ пысăккине кăтартса пама, куракансене тĕлĕнтерме пултарчĕç. Жюри членĕсене нихăш класа та малти вырăнсене памасăр хăварма йывăр пулчĕ. 7-мĕш классем, А.Г. Миллинăн «Пурнăç кустăрми» кĕнекинчи «Пысăк вăй» калав тăрăх хатĕрленĕ сценкăна пултаруллă та ĕнентĕрÿллĕ лартса пама пултарнăскерсем, 1-мĕш вырăна çĕнсе илме пултарчĕç. Иккĕмĕш вырăн 9-мĕш класра вĕренекенсене, ентешĕн «Пĕчĕк чÿречеллĕ пÿрт» ятлă кĕнекинчи «Тет хыççăн кайсан» калавĕ тăрăх хатĕрленĕ сценкăна лартнăскерсене, тивĕçрĕ. Виççĕмĕш вырăна 5-мĕш класра вĕренекенсем Миллинăн «Пĕчĕк чÿречеллĕ пÿрт» ятлă кĕнекинчи «Ăслă ача» ятлă пьесине выляса парса йышăнма пултарчĕç.
Вĕренекенсем хăйсем çырнă сăввисен вулавĕн конкурсĕн çĕнтерÿçи - 8-мĕш класра вĕренекен Петрова Ирина. Вăл А.Г.Миллин çинчен хăй илемлĕ сăвă хайланă, куракансен кăмăлне каймалла каласа пама пултарчĕ. Иккĕмĕш вырăна – 7-мĕш класра вĕренекен Ворнцова Юлия, виççĕмĕш вырăна 6-мĕш класра вĕренекен Добронравова Люда йышăнчĕç.
А.Г.Миллин хайлавĕсем тăрăх ÿкернĕ ĕçсен куравĕ те пурне те тыткăнларĕ. Ентешĕн хайлавĕсене вуласа паха ÿкерчĕксем тăвакансен йышĕ те аванах пулчĕ. Чăн-чăн курав! Жюри членĕсем пăхса тухнă хыççăн пĕрремĕш вырăна 3-мĕш класра вĕренекен Кудряшов Антон, иккĕмĕш вырăна 3-мĕш класра вĕренекен Орлов Никита, виççĕмĕш вырăна 3-мĕш класра вĕренекен Плотников Александр тивĕç пулнине çирĕплетрĕç.
Борис Александрович шкулта ĕçлекенсемпе вĕренекенсене çак пархатарлă ĕçе тивĕçлĕ шайра ирттерме пултарнăшăн кăмăлтан тав турĕ, ашшĕн «Пурнăç кустăрми» ятлă пиллĕкмĕш кĕнекине шкул библиотекине парнелерĕ. Конкурсра çĕнтернисемпе тĕрлĕ вырăнсем йышăннисене, уяв ĕçне активлă хутшăннисене хаклă парнесем парса чыс турĕ, О.Г.Петровăна тата çак уява хатĕрлекен Г.Л. Енейкинăна Тав хучĕсемпе чысларĕ.
Уявпа пурте кăмăллă юлчĕç.