Пире çутта кăлараканăмăр, И.Я.Яковлев, çĕр çине килнĕренпе кăçал 170 çул çитрĕ. Çак юбилее Патреккел шкулĕнче вĕрентекенсемпе вĕренекенсем тĕрлĕ паха ĕçсем туса кĕтсе илчĕç.
Унсăрăн пуçне çулталăк тăршшĕпех патриархăмăрăн халăхшăн тунă пархатарлă ĕçĕсене ырласа тĕрлĕ ĕç-пуç иртет. 5-9 класра вĕренекенсем И.Я.Яковлева, ун ырă ĕçĕсене, ун вĕренекенĕсене, тăсăмĕсене çутатса паракан стена хаçачĕсене кăларса çакрĕç. Ун ырă, пуçаруллă, ĕмĕр-ĕмĕр кивелми ĕçĕсене ырласа вĕренекенсем çулăмлă сăвăсем çырчĕç. И.Яковлева халалланă сценарипе ун çинчен çырнă сăвă-хайлавсемпе йĕркеленĕ литература каçĕ иртрĕ.
Нумаях пулмасть, çĕртме уйăхĕн вĕçĕнче, шкулти пултаруллă вĕренекенсем хăйсен ĕçĕсемпе Раççей çыравçисен профессионаллă ушкăнне тивĕçлипе кĕтсе илме пултарчĕç.
Авăн уйăхĕн 12-мĕшĕнче Патреккел шкулĕнчен вĕренсе тухнă, халĕ Чăваш телевиденийĕнче ĕçлекен Енейкин Алексей Чăваш кино йĕркелÿçисемпе пĕрле тăван шкулне килсе И.Я.Яковлева халалланă «И.Я.Яковлев – ачасен чĕринче» ятлă документлă фильм валли мероприятисем ирттернине ÿкерсе кайрĕ. Унта 8-мĕш класра вĕренекенсем активлă хутшăнчĕç. 9-мĕш класра вĕренекен Петрова Ирина та, Василий Эткел ячĕллĕ литература премийĕн лауреачĕ, пултарулăхĕпе палăрчĕ. 6-мĕш класра вĕренекен Дмитриева Аделина та И.Яковлева халалласа хăй çырнă сăввипе документлă фильма кĕрсе юлать тесе хĕпĕртетпĕр.
Çак паха ĕçе тума пулăшакансене шкул администрацийĕ тав турĕ.