Чăвашсене çутта кăларакан сумлă та чаплă педагогăн Иван Яковлевич Яковлевăн ятне Раççейре те, ун тулашĕнче те анлă пĕлеççĕ. Вăл 1848 çулхи ака уйăхĕн 25-мĕшĕнче Чĕмпĕр кĕпĕрнинчи Пăва уесне кĕрекен Кăнна Кушки ялĕнче çуралнă. Ялĕ Чĕмпĕр хулинчен 60 çухрăмра вырнаçнă. Йăлтах чăвашсем пурăннă унта. Тăван ашшĕ Иван çураличченех вилнĕ. Амăшĕ, Наçтук, Иван çуралсан виççĕмĕш кунне вилсе кайнă. Пирĕн, чăвашсен, лайăх йĕрке пур, тăлăха нихăçан та пăрахмаççĕ. Çапла вара, Ивана Кăнна Кушки ялĕнчи удел хресченĕсен, амăшĕн тăванĕсен – Пахомовсен – кил-йышĕ усрава илнĕ. Пĕчĕк Иван суккăрланнă ватă Паххума ертсе çÿренĕ. Тăлăх пулин те пурнăçĕ телейлĕ килсе тухнă Иван Яковлевичăн.
Чăваш Республикин Елчĕк муниципалитет округĕн Патреккелти тĕп шкулта виçĕ уйăх хушшинче И.Я. Яковлев юбилейне халалласа тĕрлĕрен мероприятисем иртрĕç. Пĕтĕм тĕнчери тăван чĕлхесен кунне халалланă эрнере те мероприятисем Аслă Вĕрентекенĕн ячĕпе иртрĕç.
Нарăс уйăхĕн 20-мĕшĕнче 5-6-мĕш классем хушшинче «Пĕлетĕр-и эсир?» литература вăййи иртрĕ. Вĕренекенсем тĕрлĕ ыйтусем çине хуравсем тупрĕç, хăйсен пĕлĕвне, тавçăрулăхне, пултарулăхне тĕрĕслерĕç. Тест евĕрлĕ йĕркеленĕ ыйтусем питĕ кăсăк. Ачасен ÿсĕмне кура йĕркеленĕскерсем пит йывăрах та мар. Пĕрремĕш турĕнче ачасем тест ыйтăвĕсене хуравларĕç, иккĕмĕш турта – «Тĕрĕс пĕлĕр» конкурсра тупăшрĕç. Вăйă пурне те килĕшнĕ; хаваслансах пĕр-пĕринпе тупăшрĕç ачасем. Туслăх çĕнтерчĕ.
Ачасем тулли кăмăлпа «Чи хитре чĕлхе» акцие, «Пĕлетĕр-и эсир?», «Тĕрĕс сăмах» вăйă-конкурссене, «Чăвашлăх çинчен» стена хаçачĕсен куравне, «Эй, чĕлхем, анне панă чĕлхем!» илемлĕ вулава, «Илемлĕ сăмах ăстисем» инсценировка лартассинче хутшăнчĕç. Шкулти «Театр тĕнчи» драмкружока çÿрекенсем С. Шавлин «Вĕçкĕн Ваççа» сăвви тăрăх кăтартнă инсценировка тăван чĕлхене лайăх вĕренмелли, юратмалли, унтан вăтанмалла марри çинчен пулнине ачасем тăнларĕç. «Тăван чĕлхесĕр пĕлÿ çук,» - тенĕ Иван Яковлевич Яковлев.
Чăваш чĕлхи çав тери пуян та илемлĕ пулнине, ытти чĕлхесем хушшинче вăл питĕ пысăк вырăн йышăннине тата та вăйлăрах туйса илчĕç ачасем.
Иван Яковлев юбилейне халалланă мероприятисем шкулта çулталăк тăршшĕпе иртĕç.
