Ака уйăхĕн 25-мĕшĕ – Чăваш чĕлхи кунĕ. Ку илемлĕ çурхи  куна  ахальтен суйласа илмен.  1848 çулхи апрелĕн 25-мĕшĕнче чăваш çырулăхне йĕркелекенĕ, пирĕн Аслă вĕрентекенĕмĕр Иван Яковлевич Яковлев çуралнă.    

    Ака уйăхĕн   18-мĕшĕнчен  пуçласа 26-мĕшĕччен Патреккелти пĕтĕмĕшле пĕлÿ паракан тĕп  шкулта «Савăнатăп хам чăваш пулнишĕн!» ятпа  Чăваш чĕлхине халалланă эрнелĕх иртĕ. Эрнелĕхри мероприятисене Чăваш Республикинчи Телейлĕ ачалăх çулталăкне тата чăвашсене çутта кăлараканĕ И.Я. Яковлев 175 çул тултарнине те халалланă.

     Чăвашлăха упрас, малалла аталантарас, тăван чĕлхене татах та тăрăшуллăрах вĕренме хавхалантарас тĕллевпе шкулта çак эрнере тĕрлĕрен мероприятисем ирттерме палăртнă.

      Вĕренекенсем тата вĕрентекенсем паян, ака уйăхĕн 18-мĕшĕнче, Чăваш чĕлхипе литература эрнине уçма шкулти вулавăша пухăнчĕç. Вулавăш ертÿçи Т.В.Никифорова И.Я. Яковлев пурнăçĕпе пултарулăхĕ çинчен кĕнекесен, ÿкерчĕксен выставкисем, çавăн пекех сăн ÿкерĕнмелли фотозона та  хатĕрленĕ. Чăваш чĕлхипе литературине вĕрентекен И.В. Ванюшина эрнелĕхе уçса хамăр чăваш чĕлхи çинчен «Ытарайми чĕлхем» çепĕç пуплев саманчĕ ирттерчĕ, мероприятисен планĕпе паллаштарчĕ, шкулти 5-9 –мĕш классем хушшинче ăмăрту евĕр иртекен викторина ыйтăвĕсене валеçрĕ. Çĕнтерÿçĕсене эрнелĕх вĕçĕнче палăртĕç, чыслĕç.

     Шкул шайĕнче туса ирттерекен тĕрлĕрен мероприятисемпе пĕрлех улттăмĕш класра вĕренекен пултаруллă ачасемпе округри шкул театрĕсен фестиваль куравне те хутшăнма хатĕрленетпĕр.