Ака уйăхĕн 25-мĕшĕ – Чăваш Республикинче Чăваш чĕлхин кунĕ. Çак куна халалласа паян, ака уйăхĕн 25-мĕшĕнче,  «Илемлĕ, илемлĕ..» кĕвĕ янăравĕпе Чăваш Республикинчи Елчĕк муниципалитет округĕнчи Патреккелти тĕп шкулта И.Я. Яковлева халалланă «Эпир – И.Яковлев мăнукĕсем» концерт пуçланчĕ. Чăваш çи-пуçĕ тăхăннă ачасем алла-аллăн тытăнса чăваш тĕррисемпе илемлетнĕ зала утса кĕчĕç. Кунĕпех паян вĕсем шкулта  чăваш тумĕпе çÿрерĕç.

    Уява 8, 9-мĕш класра вĕренекенсем С. Воронцовăпа А. Горшкова ертсе пычĕç. Вĕсем пурне те Чăваш чĕлхи кунĕ ячĕпе саламларĕç. Çавăн пекех экран ҫинчен шкул ачисене Чăваш Республикин пуҫлăхě О. Николаев саламларě. Концертра илемлĕ сăмах ăстисем чăваш чĕлхи çинчен сăвăсем каласа чĕрене хумхантарчĕç, юрăçсем «Асамат кĕперĕ», «Анне, эсĕ ир тăран», «Урокра» юрăсем шăратрĕç, ташăçăсем тĕрлĕрен ташăпа куракансене килентерчĕç.

     Зала уява тăрăшса капăрлатнă. Тĕррисене Н.Н. Филиппова вĕрентсе пынипе 6-8-мĕш класс хĕрачисем кавир тĕррипе тĕрленĕ.  Шкулти вулавăш ертÿçи Т. В. Никифорова «И.Я. Яковлев – чăвашсен аслă вĕрентекенĕ» кĕнекесен пуян выставки хатĕрленĕ.

   Чĕлхемĕр пирĕн питĕ илемлĕ, çепĕç, пуян. Ахальтен мар И.Я.Яковлев çапла каланă: «Чăвашсен ку тарана çити упраннă пуянлăхĕ тата тĕлĕнтермĕшĕ вăл – чĕлхе, юрă, тĕрĕ».