Чăваш Республикин Елчĕк муниципалитет округĕнчи Патреккелти пĕтĕмĕшле пĕлÿ паракан тĕп шкулта ака уйăхĕн 18-мĕшĕнчен пуçласа 26-мĕшĕччен «Савăнатăп хам чăваш пулнишĕн!» ятпа  Чăваш чĕлхипе литературин эрни иртрĕ. Эрнелĕх планĕпе килĕшÿллĕн кунсерен тĕрлĕрен мероприятисем пулса иртрĕç. Мероприятисене Чăваш Республикинче Телейлĕ ачалăх çулталăкне, И.Я. Яковлевăн 175 çулхи юбилейне халалланă.

   Тĕллевĕ: Ачасене халăх традицийĕсене упрама, тăван чĕлхене юратса вĕренме хавхалантарасси, чĕлхе илемĕпе пуянлăхне туйма, пĕлÿлĕхе ÿстерме пулăшасси.

    Шкулта ытлари кун -  Чăваш чĕлхин эрнине  уçса шкулти вулавăшра «Савăнатăп хам чăваш пулнишĕн!» литература монтажĕ иртрĕ, Вулавăш ертÿçи Т.В.Никифорова И.Я. Яковлев пурнăçĕпе пултарулăхĕ çинчен кĕнекесен, ÿкерчĕксен выставкисем хатĕрленĕ. 9-мĕш класра вĕренекенсем чăваш чĕлхин паллăрах тĕпчевçисем, пирĕн çырулăхăн тапхăрĕсем çинчен рефератсем çырса хатĕрленĕ. А.Горшкова И.Я.Яковлев пурнăçĕпе чăваш халăхĕшĕн тунă пысăк ĕçĕсем çинчен каласа пачĕ, К.Кудрявцевăпа Е. Алюкина кивĕ тата çĕнĕ çырулăх пирки тĕплĕн ăнлантарса пачĕç. К. Скворцовăн ĕçĕ «М.И. Скворцов – паллă чăваш чĕлхеçи» çинчен пулчĕ. Ака уйăхĕн 20-мĕшĕнче шкулта И. В. Ванюшина ертсе пыракан «Театр тĕнчи» драмкружок членĕсемпе «Асам» округри шкул театрĕсен фестивальне хутшăнтăмăр. Ака уйăхĕн 21-мĕшĕнче чăваш чĕлхи çинчен 5-7-мĕш классем хушшинче «Чĕлхе – халăх мулĕ» вăйă-викторина иртрĕ. Вăйă пурне те килĕшнĕ; хаваслансах пĕр-пĕринпе тупăшрĕç ачасем. Хĕрÿ тупăшура улттăмĕшсем пĕрремĕш вырăна тухрĕç, çиччĕмĕшсем – иккĕмĕш, пиллĕкмĕшсем – виççĕмĕш. Акан 25-мĕшĕ – Чăваш чĕлхи кунĕ. И.Я. Яковлева халалланă «Эпир – И.Яковлев мăнукĕсем» концерт иртрĕ çак кун. Акан 26-мĕшĕнче «Пĕтĕм Чăваш диктанчĕ - 2023» акцие хутшăнма шутлатпăр. Акцие 9 ача хутшăнма кăмăл турĕ. Ĕçсене тĕрĕслесси пырать. Эрне тăршшĕпе «Чăвашлăх çинчен» стена хаçачĕсен куравĕ пулчĕ.

   Шкул ачисем активлă пулчĕç, хушнă ĕçсенчен пăрăнмарĕç. Уйрăм тав сăмахĕ пуçламăш класс вĕрентекенĕсене тата Т.В. Никифорова библиотека ĕçченне калас килет. Вĕсем И.Я.Яковлева халалланă ÿкерчĕксен, кĕнекесен куравĕ хатĕрленĕ, ачасене юрă-ташă ăсталăхне вĕрентнĕ. Т. В. Никифорова мероприятисене шкул сайтĕнче хыпар, сăн ÿкерчĕк лартса çутатрĕ.

    Эрне тухăçлă иртрĕ. Шкул директорĕн çумĕ Т.З. Скворцова хăй ятĕнчен, шкул администрацийĕн ячĕпе пурне те ырласа, саламласа тав сăмахĕ каларĕ, пĕтĕмлетÿсем туса çĕнтерÿçĕсене хисеп хучĕ пачĕ.